Bulsha:- Wararka naga soo gaaraya magaalada Baardheere ee G/gedo ayaa sheegaya in saakay magaalada Jawigeeda uu yahay mid aad u kacsan,waxaana albaabada laysugu laabay dhamaan goobaha Ganacsiga, waxaana sidoo kale hakad ku jira isku socodka Gaadiidka iyo Dadweynaha.
Wararku waxay intaas ku darayaan in ciidamada Itoobiya ee qeybta ka ah AMISOM iyo kuwa maamulka Jubba ay soo dageen deegaano aan sidaas uga fogeyn magaalada, taasoo cabsi iyo wal wal ku abuurtay dadka deegaanka.
Saraakiil ka tirsan ciidamada dowladda oo aan xiriir la sameeynay ayaa inoo xaqiijiyay in ciidamada dowladda iyo kuwa Itoobiya ay shalay soo gaareen deegaan lagu magacaabo Eesoow, kaasoo qiyaastii 60KM dhanka waqooyi bari kaga beegan magaalada Baardheere ee gobolka Gedo.
Sidoo kale, isla shalay dayaarado nooca dagaalka ah ayaa duqeeyay saldhigyo ay xoogagga Al-shabaab ku lahaayeen deegaanka Ceelcilaan oo qiyaastii 40 KM u jira magaalada Baardheere.
Sidoo kale wararku waxay sheegayaan in ciidamadii Al-shabaab ee magaalada Ku sugnaa ay intooda badan isaga huleeleen, iyagoo qabtay dhinaca Degmada Diinsoor.
_______________________
Xafiiska Shabakada Bulsha
UK- Leicester united kingdom
Blogger Comment
Facebook Comment