Bulsha:- Madaxweynaha dalka Mareykanka Barack Obama ayaa shir looga hadlayo arimaha ganacsiga ka furamay magaalada Nairobi oo uu ku joogo booqasho qaadan doonta sadax maalmood.
Shirkan oo ka furmay Xarunta Qaramada Midoobe Ee Magaalada Nairobi, ayaa waxaa ka qaybgalay xubno ka kala socday illaa 120 dal, sida uu madasha shirka ka sheegay Madaxweynaha Mareykanka.
“Afrika horay ayay u socotaa, dadka ayaa saboolnimada ka baxaaya, mishaarka ayaa kordhaya, dadka xirfada ku shaqeeya ee mishaarkooda fiican yahay ayaa kordhay.” Ayuu yiri Madaxweynaha Mareykanka.
Madaxweynaha, ayaa tilmaamay in Qaaradda Afrika ay noqon doonto xudunta dhaqaalaha caalamka, hogaankana ay u qaban doonto dhaqaalaha dunida, isagoo ammaanay kororka xoogga leh ee dhaqaalaha Afrika uu samaynaayo.
Barack Obama, ayaa sidoo kale ammaanay is bedelka weyn ee ka curtay dalka Kenya. Waxa uu soo hadalqaaday booqasho uu ku yimid 10 sano ka hor, in sidaan uu ka duwanaa xaalka Kenya, sida uu yiri.
Inkastoo uu qiray horumar ballaaran in Kenya samaysay, ayuu hadana Xukuumadda Nairobi uu kula dardaarmay inay hubiso musuq maasuqa baahsan ee dalkaasi ka jira, sidii lagu soo afjari lahaa.
Madaxweyne Obama, ayaa saacadaha soo socda waxa uu Madaxtooyada Nairobi uu wadahadal kula lee yahay Madaxweynaha Kenya, Uhuru Kenyatta.
_______________________
Xafiiska Shabakada Bulsha
UK- Leicester united kingdom
Blogger Comment
Facebook Comment