Bulsha:- Sheekh Cumar Salaad Kediye oo ka mid ah Culimada Somalida Kenya, ayaa waxaa maalintii saddexaad laga la’yahay Magaalada Garissa ee Xarunta Gobolka Waqooyi Bari Kenya.
Sheekh Cumar Salaad Kediye, ayaa ahaa Imaamkii Masjidka Jaamacadda Magaalada Garissa, ka hor inta aynaan Ururka Al Shabaab weerar qorsheysan ku qaadin, 2-dii bishii April ee sanadkan.
Sheekha, ayaa waxaa la waayay gelinkii dambe ee maalintii Talaadada, xilli uu suuqa adeeg kaga doonay qoyskiisa, sida ay sheegtay afadiisa oo la hadashay laanta afka Somaliga ee VOA.
Nuur Barre Cali oo ka mid ah Siyaasiyiinta Gobolka Waqooyi Bari, ayaa si xoogan Dowladda Kenya ugu eedeeyay inay iyadu ka masuul tahay, tallaabada gaari uu la socday loogala degay Wadaadka.
Nuur Barre wuxuu hay’adaha ammaanka Kenya uu ugu baaqay haddii wax dembi ah lagu haysto Wadaadka, inay baaritaano ku sameeyan muddo 24 saacadood ah, dabadeedna ay Maxkamad soo taaggaan.news
Nuur oo la hadlay VOA, ayaa carabka ku adkeeyay Cadaalad daro inay tirsanayaan, isla-markaana ay saluugsan yihiin in sidaa lagula dhaqmo Culima’udiinkii Deegaanka.
Booliska Magaalada Garissa, ayaa si xoogan u beeniyay eedeymaha kaga yimid ehelada Sheekha, waxayna sheegeen inaanay waxba kala socon xarigiisa, isla-markaana aan lagu hayn Xarumaha Dembi Baarista Garissa.
Kenya, ayaa horey u gaysatay tacadiyo ka dhan ah Culimada Gobolada Waqooyi Bari Kenya iyo Xeebta, inkastoo laamaha ammaanka Kenya ay iska fogeeyan inay xadgudubyo kula kacaan Culimada Muslimiinta.
_______________________
Xafiiska Shabakada Bulsha
UK- Leicester united kingdom
Blogger Comment
Facebook Comment