Bulsha:- Ilo xog ogaal ah oo u waramay Warfaafiye, ayaa noo xaqiijhiyay inay socdaan qorshe la doonayo in Isku shaandheyn loogu sameeyo Golaha Wasiirada Soomaaliya, iyadoo arrintan ay kulamo iyo wada tashi ka lahaayeen Madaxweynaha iyo Ra’iisul Wasaaraha.
Wasiirka 1-aad ee xukuumada oo haatan safar uga maqan dalka, ayaa inta uun ka safrin dalka la tashi uu arintaan kala sameeyay M/weynaha, waxay isla meel dhigaan in isku shaandheyn lagu sameeyo Xukuumada marka uu dalka dib ugu soo laabto.
Wararka qaar ayaa sheegaya in qaar ka mid ah Wasiiraddii horay loo diiday ay ka soo dhex muuqan doonaan isku shaandheynta, halka xubno qaarna ay daaqada ka bixi doonaan, waxayna isku shaandheyntan noqon doonin mid Golaha Baarlamaanka looga baahdo ansixin.
Ilaha aan warkan ka soo xigan ayaa sidoo kale inoo xaqiijiyay inay u badan tahay qaar ka mid ah saaxibada Madaxweynaha inay ku soo laabtaan masraxa Golaha Wasiirada, waxaase la ogeyn xilalka ay heli doonaan, waxaana durba si horu dhac ah loo calaamadeynaya xubno ay dhici karto inay meesha ka baxaan.
Waxaa sidoo kale lagu wadaa in isku shaandheyntan ay dhacdo dhamaadka bisha Ramadaan ama illaa bisha Soon-fur, waxaana isku shaandheyntan imaaneysaa marka ay Xukuumaddan u buuxsanto lix bilood, maadaama ay haatan u socoto bisha shanaad.
Dhinaca kale waxaa soo baxaya warar sheegaya in C/llaahi Maxamed Cali (Sanbaloolshe) loo magacaabay Safiirka Turkiga, balse warkan ayaan wali xaqiijin karin, marka laga reebo hadal heynta beryahan jirtay, waxaana la sheegayaa in dhowaan Golaha Wasiirada magacaabi doonaan Safiiro cusub oo dalalka Turkiga iyo Mareykanka ah.
_______________________
Xafiiska Shabakada Bulsha
UK- Leicester united kingdom
Blogger Comment
Facebook Comment